O sábado celébrase a Gala das Letras da AELG e coñeceránse as obras gañadoras dos premios AELG 2015

(A Coruña, 7 de maio de 2015) Os socios e socias da AELG xa escolleron as obras editadas en 2014 gañadoras nas modalidades de ensaio, poesía, narrativa, tradución, teatro, blog literario, literatura infanto-xuvenil e traxectoria xornalística. Nestes dous últimos casos tamén participaron na elección os asociados de Gálix (Asociación galega do libro infantil e xuvenil) e os membros do Colexio de Xornalistas respectivamente.

As obras gañadoras daranse a coñecer na Gala das Letras, un dos actos máis importantes na vida da Asociación de Escritoras e Escritores en Lingua Galega, que comezará ás 20.00 do sábado 9 de maio no Círculo de las Artes de Lugo.

Son finalistas as obras:

Blog literario

• Caderno da crítica, de Ramón Nicolás [https://cadernodacritica.wordpress.com/]
  § Criticalia, de Armando Requeixo [http://armandorequeixo.blogaliza.org/]
  § Versos e aloumiños, de Antonio García Teijeiro e Antón García Fernández [http://garciateijeiro.blogspot.com.es/]

Ensaio

• Á procura da poesía. Vida e obra de Luz Pozo Garza, de Aurora López e Andrés Pociña (Alvarellos Editora)
  § Galiza, um povo sentimental? Género, política e cultura no imaginário nacional galego, de Helena Miguélez-Carballeira (Através Editora)
  § Leandro Carré. Un século de cultura e compromiso, de Xosé Manuel Maceira Fernández (Alvarellos Editora)

Literatura Infanto-Xuvenil

• Escarlatina, a cociñeira defunta, de Ledicia Costas (Edicións Xerais de Galicia)
  § Penúltimas tendencias, de Carlos Negro (Edicións Xerais de Galicia)
  § Tes ata as 10, de Francisco Castro (Editorial Galaxia)

Xornalismo Cultural

• Alberto Ramos
  § Blanca-Ana Roig Rechou
  § Carme Vidal
  § Montse Dopico

Narrativa

• 55, de Xavier Queipo (Edicións Xerais de Galicia)
  § A viaxe de Gagarin, de Agustín Fernández Paz (Edicións Xerais de Galicia)
  § Dende o conflito, de María Reimóndez (Edicións Xerais de Galicia)
  § Máscaras rotas para Sebastian Nell, de Alberto Ramos (Editorial Galaxia)
  § Olympia Ring, 1934, de Xabier López López (Editorial Galaxia)
  § Zapatillas rotas, de Xabier Quiroga (Edicións Xerais de Galicia)

Poesía

• A distancia do tambor, de Eva Veiga (Espiral Maior)
  § As voces da máscara, de Arcadio López-Casanova (Pen Clube de Galicia)
  § Celebración, de Gonzalo Hermo (Apiario)
  § dun lago escuro, de Marta Dacosta (Edicións Xerais de Galicia)
  § Transfusión oceánica, de Xosé Iglesias (A. C. Caldeirón)

Teatro

• Aos Reis Magos non lles gustan os caramelos de menta, de Isabel Freire (Editorial Galaxia)
  § Lapsus. A comedia de existir, de Alfonso Pexegueiro (Axóuxere Editora)
  § Obras completas. Volume IV, de Roberto Vidal Bolaño (Edicións Positivas)

Tradución

• A Divina Comedia, de Dante Alighieri, en tradución de Darío Xohán Cabana (Edicións da Curuxa)
  § Jude o escuro, de Thomas Hardy, en tradución de María Fe González (Editorial Hugin e Munin)
  § Tempo de exilio, de Joseba Sarrionandia, en tradución de Isaac Xubín (Faktoría K de Libros)
  § Un matrimonio provinciano, da Marquesa Colombi, en tradución de Isabel Soto (Editorial Hugin e Munin)

Hai fotos dispoñíbeis daqueles finalistas que son socios/as da AELG na fototeca da web da Asociación: http://www.aelg.org/Centrodoc/GetPhotoLibrary.do

Alén destas categorías, os Premios AELG constan doutros tres galardóns outorgados pola Asemblea de Socios e Socias da AELG:

• O premio Mestres e Mestras da Memoria, que chega á súa terceira edición, que se concede a Josefa Arias Castelo, de Vilalba, e a Emilio Pérez Álvarez, “Emilio do Pando”, do concello da Fonsagrada, por toda unha vida de dedicación exemplar á transmisión oral de saberes e valores da nosa cultura popular tradicional.
• O Premio AELG Institucións 2015, que se concede a aquelas entidades que contribuísen á divulgación da lingua e cultura galega e que este ano, pola súa defensa dos dereitos profesionais dos/as xornalistas, por ter o idioma galego e o xornalismo cultural como prioridade, e por promover os valores éticos na escrita xornalística, se concede ao Colexio Profesional de Xornalistas de Galicia; e polo seu empeño en que Galiza teña uns medios de comunicación galegos e en galego e, por tanto, pola súa contribución ao proceso de normalización lingüística e cultural á Asociación de Medios en Galego. Recollerán o premio Xosé Manuel Pereiro, decano do Colexio Profesional de Xornalistas de Galicia e Henrique Sanfiz, presidente da Asociación de Medios en Galego.
• E mais o Premio AELG 2015 Escritor Galego Universal , que na súa décima edición recollerá o escritor brasileiro Luiz Ruffato; este galardón que xa recibiron Mahmud Darwix, Pepetela, Nancy Morejón, Elena Poniatowska, Juan Gelman, Antonio Gamoneda, José Luis Sampedro, Lídia Jorge e Bernardo Atxaga, e co que a Asociación de Escritoras e Escritores en Lingua Galega destaca aqueles autores e autoras que unen á excelencia literaria o compromiso ético que os converte en referentes na defensa da dignidade nacional e humana. Vexa aquí a súa axenda en Galicia.

No transcurso da Gala das Letras a Asociación de Escritoras e Escritores en Lingua Galega entregará tamén o seu recoñecemento anual “Os Bos e Xenerosos”, que chega este ano á súa duodécima edición e que supón un acto de recoñecemento dunha figura ou colectivo que, pola súa dilatada actividade de intervención social, contribuíse á difusión da nosa cultura. Neste caso, pola súa contribución en diversos eidos do Xornalismo, sempre á altura das necesidades do seu tempo e, particularmente, por poñer os alicerces para termos uns medios de comunicación galegos e en galego, serán nomeados Bos/Boas e Xenerosos/as Xosé María García Palmeiro, Margarita Ledo Andión, Manuel Lombao e Tareixa Navaza.

A Gala das Letras contará coa actuación musical “Os sons esquecidos”, a cargo de Abraham Cupeiro e Iago González, e é un acto aberto con entrada libre até completar capacidade.

A duración prevista é de 100 minutos, aínda que as obras gañadoras se darán a coñecer durante a primeira parte da Gala.

Co apoio da área de Cultura da Deputación Provincial de Lugo, Consellaría de Cultura, Educación e Ordenación Universitaria e Concello de Lugo e a colaboración do Círculo de las Artes