O Curso de español do Camiño de Santiago chega á súa terceira edición

‘Estás in? Are you in?’. Con este lema, a USC porá este ano en marcha a terceira edición do Curso do Camiño de Santiago 2010, unha iniciativa formativa na que ao longo de dúas semanas os matriculados poderán mellorar os seus coñecementos de español e recibir clases na USC sobre diferentes aspectos do Camiño Xacobeo.

Inf. coord. por José A. Sierra
O desenvolvemento das distintas sesións celebrarase en dúas quendas, a primeira entre o 31 de maio e o 11 de xuño e a segunda do 4 ao 15 de outubro, reservando a segunda semana a percorrer o tramo final do Camiño acompañados dun profesor.

O curso é unha oferta diferenciada e singular en relación a oferta internacional doutras universidades españolas, dado que incorpora a experiencia como eixe para coñecer e vivir as culturas española e galega o mesmo tempo que se practica e mellora nos coñecementos da lingua española.

E está a obter, segundo a dirección de Cursos Internacionais, unha excelente acollida entre as persoas que están interesadas na aprendizaxe do idioma español. Neste senso, o programa formativo estivo presente en diversas feiras e congresos nos que se realizaron presentación específicas aos potenciais alumnos.

O programa académico deseñada permite aos matriculados familiarizarse coa lingua ao tempo que achegarse ás claves históricas, ao mito, ás lendas, aos símbolos e ás tradicións dunha das peregrinación milenarias máis internacionalmente recoñecido. Para elo, simultanearanse clases de lingua impartidas por especialistas do ensino do español como lingua estranxeira con seminarios sobre o Camiño, clases prácticas e aulas itinerantes, actividades culturais, acceso gratuíto aos servizos universitarios e aloxamento en habitación dobre e media pensión.

Esta é unhas das actividades principais de Cursos Internacionais para o presente ano, á que hai que engadir os xa habituais cursos de lingua e cultura con fins específicos. Trátase dos cursos de español dos negocios; turismo, gastronomía; e cursos de formación para profesores de ELE (Español e Lingua Estranxeira), todos eles en Compostela. Pola súa banda, en Lugo e por vez primeira, as persoas interesadas poderán optar por dúas propostas, Español e Ciencias Medioambientais ou Español e Ciencias da Saúde.

Todos eles conforman a oferta xa estable de Cursos Internacionais USC, cunha programación académica deseñada con máximo rigor e coa vontade de satisfacer as necesidades daqueles estudantes internacionais, que elixen o noso destino entre a oferta do norte peninsular, nunha cidade como é Compostela e nunha institución académica como é a Universidade de Santiago de Compostela.